Դատավորների աշխատավարձերի բարձրացումն էականորեն կնվազեցնի կոռուպցիոն ռիսկերը. Վազգեն Ռշտունի
Այս թեմայով
- Նարեկ Մանթաշյանը ներկայացրել է նոր Հայաստանի կոռուպցիոն երևույթները (ՏԵՍԱՆՅՈՒԹ)
- ԲՀԿ պատգամավորին կդատի Մեսրոպ Մակյանը
- Ս. Ադյանը և Գ. Խաչատրյանը ՊՎԾ օրինակելի և լավագույն աշխատակիցներից են. Դ. Սանասարյանը՝ ՊՎԾ աշխատակիցների կալանավորման մասին
- Ալեքսանդր Ազարյան․ Հետհեղափոխական մթնոլորտը չպետք է ազդի դատավորի վրա
Դատավորների աշխատավարձերի բարձրացումը էականորեն կնվազեցնի կոռուպցիոն ռիսկերը։ Այս մասին այսօր՝ փետրվարի 26–ին ՀՀ վերաքննիչ քրեական դատարանում լրագրողների հետ զրույցում հայտարարեց ՀՀ վերաքննիչ քրեական դատարանի նախագահ Վազգեն Ռշտունին։
«Կոռուպցիան այն խնդիրն է, որի դեմ առաջին հերթին պետք է պայքարի դատական իշխանությունը, քանի որ դատական համակարգի ներկայացուցիչները, լինելով արդարադատության գործընթացների բուրգում, առաջինը պետք է զերծ մնան նման գործելաոճից»,–ասաց նա։
Ռշտունու խոսքով՝ Հայաստանի պետական մյուս մարմինների աշխատողների աշխատավարձերի համեմատ, դատավորների աշխատավարձը բավականին բարձր է, սակայն ըստ նրա ՝որքան էլ բարձր լինի աշխատավարձը, միևնույն է՝ պետությունից սպասելիքները շատ ավելի շատ են։
Դատարանի նախագահի կարծիքով՝ դատավորների աշխատավարձերի բարձրացումը էականորեն կնվազեցնի կոռուպցիոն ռիսկերը.
«Զուտ մարդկային առումով բնականաբար բարձր վարձատրվող աշխատավարձը վտանգի ենթարկելը ոչ շահավետ է, քան ցածր աշխատավարձինը»,–ասաց նա։
Հարցին, թե ի՞նչ սոցիալական երաշխիքներ են հարկավոր դատավորների անկախության համար, Ռշտունին պատասխանեց.
«Սոցիալական երաշխիքներից ամենակարևորը կենսաթոշակային տարիքում բավարար չափով կենսաթոշակ ստանալն է։ Վերջին տարիներին կատարված փոփոխությունների արդյունքում պաշտոնաթող դատավորների վիճակը որոշակիորեն վատթարացել է»,–ասաց նա նկատելով, որ նախկինում ավելի լավ պայմաններ էր նախատեսված կենսաթոշակի գնացող դատավորների համար, քան այսօր։
Անդրադառնալով դատավորներին սոցիալական փաթեթի շահառուների շրջանակում ներառելու կառավարության որոշմանը, Վազգեն Ռշտունին ասաց.
«Այս որոշման արդյունքում էականորեն կնվազեն դատավորի ծախսերը, բացի այդ դա լրացուցիչ խթան է դատավոր աշխատաելու և իրենց գնահատված համարելու։ Սոցիալական փաթեթը կարող է լուծել շատ խնդիրներ՝ դատավորների առողջական վիճակի հետ կապված հարցերը լուծելու կամ նրանց հանգիստը կազմակերպելու հետ։ Համարում եմ, որ այդ որոշումը շատ լավ գնահատական էր՝ հասարակությանը ցույց տալու, որ դատավորները մեր հասարակությանը խորթ չեն և որ նրանց աշխատանքը նույնպես կարելի է գնահատել»։
Հիշեցնենք, որ կառավարությունը փետրվարի 21–ի նիստում որոշում էր կայցրել դատավորներին և Բարձրագույն դատական խորհրդի անդամներին ներառել սոցիալական փաթեթի շահառուների շրջանակում։