Դավիթ Խաժակյան. Երևանի քաղաքապետարանը շրջանցել է մայրաքաղաքի ավագանու որոշումը
Այս թեմայով
- Ազատագրում ենք Օպերայի շրջակայքը. սա պրոցեսի սկիզբն է, այն լինելու է շարունակական. քաղաքապետ
- Քաղաքապետարանի մուտքի մոտ բարձրացած «Նիվա»-յի հետ կապված միջադեպով նյութեր են նախապատրաստվում
- Մամուլի հետ այդ տոնով խոսել չի կարելի, դա խաղ է կրակի հետ. Բյուզանդի 1/3 շենքում գործող լրատվամիջոցների ներկայացուցիչները՝ տարածքն ազատելու պահանջի մասին
- Հայկ Մարությանի որոշմամբ՝ «Հրապարակ» օրաթերթին եւ այլ լրատվամիջոցներին վտարում են խմբագրությունների տարածքներից
Երեւանի քաղաքապետարանը կայացրել է որոշում՝ շրջանցելով մայրաքաղաքի ավագանուն։ Այս մասին փետրվարի 28-ին լրագրողների հետ հանդիպմանն ասել է Երեւանի ավագանիում «Լույս» խմբակցության ղեկավար Դավիթ Խաժակյանը՝ մեկնաբանելով մի շարք լրատվամիջոցների վտարման հետ կապված իրավիճակը։
Նրա խոսքով՝ քաղաքապետը, ըստ էության, չարաշահում է իր լիազորությունները, քանի որ որեւէ տարածք անհատույց տրամադրելու նպատակով քաղաքապետարանը դիմում է ավագանուն։ «Նախորդ գումարման քաղաքապետարանի նիստերից մեկի ժամանակ ավագանին հաստատել է այդ առաջարկությունը»,- նշել է նա։ Խաժակյանն ընդգծել է, որ քաղաքապետարանը, նման որոշում ընդունելով, պետք է իմանա, թե ում վրա է այն տարածվելու, կամ եթե հաշվի չեն առել, ապա դա վկայում է ոչ պրոֆեսիոնալիզմի մասին։ «Կան ԶԼՄ-ներ, որոնք միջոցներ ունեն եւ կարող են իրենց թույլ տալ մեծ ծախսեր, եւ կան այնպիսիները, որոնք այդ միջոցները չունեն։ Ի՞նչ վատ բան կա նրանում, որ նրանք ստանում են քաղաքապետարանի աջակցությունը։ Ցանկացած պարագայում բոլոր որոշումները պետք է ընդունվեն ավագանու կողմից»,- պարզաբանել է նա։
«Հանրապետություն» կուսակցության անդամ Անի Խաչատրյանն, իր հերթին, ասել է, որ քաղաքապետարանի որոշման մեջ տեսնում է տեղեկատվության ոչ ճիշտ տրամադրում։ «Չեմ կարծում, որ դա արվում է միտումնավոր՝ այս կամ այն կազմակերպության աշխատանքին վնասելու նպատակով։ Պետք է այս հարցին ցուցաբերել անհատական մոտեցում։ Այստեղ հարցը միայն լրատվամիջոցները չեն, այդ շենքերում կան շատ այլ կազմակերպություններ։ Ոմանք շահույթ են հետապնդում, ոմանք՝ ոչ։ Դա պետք է հաշվի առնել»,- նշել է նա։
Երեւանի ավագանու նախկին անդամ Անահիտ Բախշյանն, իր հերթին, քաղաքապետարանին կոչ է արել տարբերակված մոտեցում ցուցաբերել։ «Կա պայմանագիր տարածք տրամադրելու մասին, որտեղ հիմա գտնվում է Յուրի Բախշյանի անվան մանկական ֆիլհարմոնիան, եւ կա Երեւանի ավագանու որոշումը։ Պայմանագրում կան կետեր, որոնցով հնարավոր է նրա դադարեցումը։ Բայց ոչ մի պայման՝ պայմանագրում նշված, չի համապատասխանում նրան, թե ինչի հիման վրա են խնդրում ֆիլհարմոնիային ազատել տարածքը։ Ընդ որում՝ դա արվում է առանց ավագանու որոշման։ Իբր Երեւանի համայնքը հրաժարվում է պայմանագրից։ Եվ անգամ ձեւակերպումն ինքը անօրինական է»,- բացատրել է նա
Հիշեցնենք, որ ԶԼՄ-ները եւ մյուս կազմակերպությունները, որոնք գտնվում են Արշակունյաց 2, ինչպես նաեւ Իսահակյան 28 եւ Բյուզանդի 1/3 շենքերում, ծանուցում են ստացել այն մասին, որ պետք է ազատեն իրենց զբաղեցրած տարածքները։