Tert.am. «Իմ քայլը» հիմնադրամին 7 ամսում փոխանցվել է շուրջ 1,7 մլն դոլար

ՀՀ վարչապետի տիկնոջ՝ Աննա Հակոբյանի «Իմ քայլը» հիմնադրամին այս տարվա փետրվարի 15-ի դրությամբ  փոխանցվել է 859 մլն 55 հազար դրամ (մոտ 1 մլն 746 հազար դոլար)։ Այս մասին հաղորդում է Tert.am-ը, հիշեցնելով, որ հիմնադրամն ստեղծվել է 2018 թվականի հուլիսին և ստեղծման պահին միջոցներ չի ունեցել:

Հիմնադրամի հիմնադրման օրվանից Աննա Հակոբյանն այցելել է երկու երկիր:

Հարցին, թե հիմնադրամի ստեղծման օրվանից մինչև հունվարի 20-ը քանի՞ երկիր է աշխատանքային նպատակով ուղևորվել Աննա Հակոբյանը, հիմնադրամից պատասխանել են. «Հիմնադրամի հիմնադրման օրվանից մինչև հունվարի 20-ը Աննա Հակոբյանը մեկնել է աշխատանքային երկու ուղևորության՝ 2018 թ. նոյեմբերի 11-13-ը՝ Մոսկվա, 2018 թ. դեկտեմբերի 11-17-ը՝ Շվեյցարիա։ Երկու ուղևորությունների արդյունքում միասին հիմնադրամի գործունեության համար հավաքագրվել է շուրջ 173 միլիոն ՀՀ դրամին համարժեք գումար»։

Հարցին, թե Կառավարության կազմից և ոչ միայն ովքեր են որպես ՀՀ վարչապետի տիկնոջ ուղեկցում Աննա Հակոբյանին արտերկրում, հայտնել են, որ աշխատանքային երկու ուղևորությունների ընթացքում Աննա Հակոբյանին ուղեկցել են ՀՀ վարչապետի աշխատակազմի արարողակարգի բաժնի երկու աշխատակիցներ. «Մոսկվա կատարած ուղևորության ընթացքում պատվիրակության կազմում եղել է նաև «Իմ քայլը» հիմնադրամի գործադիր տնօրեն Հովհաննես Ղազարյանը։ Շվեյցարիա կատարած ուղևորությանը, վերը նշված անձանցից բացի, մասնակցել է նաև մամուլի քարտուղար Հասմիկ Հարությունյանը»։

Ինչ վերաբերում է հարցին, թե երկրներում ինչ դասի հյուրանոցներում և որ հյուրանոցներում է հանգրվանել Աննա Հակոբյանը, հիմնադրամից հայտնել են. «Մոսկվայում հանգրվանել է Ararat Park Hyatt հյուրանոցում, սենյակը տրամադրվել է 13,000 ռուբլով (նմանատիպ սենյակի ստանդարտ արժեքը 25-26 հազար ռուբլի է)։ Շվեյցարիայում հանգրվանել է La Réserve Genève հյուրանոցում, սենյակի արժեքը՝ 305 շվեյցարական ֆրանկ։ ՌԴ-ում մնացել է 2 օր, Շվեյցարիայում՝ 5 օր»։

Հարցին, թե որքան է կազմում հիմնադրամի բյուջեն 2019 թ. հունվարի 20-ի դրությամբ, հայտնել են, որ փետրվարի 15-ի դրությամբ հիմնադրամի հաշվեհամարներին մուտք է արվել 859 մլն 55 հազար դրամի նվիրատվություն։ Այդ գումարի մի մասը՝ 454 մլն 626 հազար դրամ, նպատակային նվիրատվություններ են։ Մասնավորապես, նվիրատուները 241 մլն 300 հազար դրամ փոխանցել են Մեղրիի մանկապարտեզի հիմնանորոգման, 194 մլն 880 հազար դրամ՝ վիրավոր և հաշմանդամ զինծառայողների վերականգնողական բուժման, 12 մլն դրամ՝ «Քայլ առ քայլ» ծրագրի և 6 մլն 446 հազար դրամ՝ «Առանց պլաստիկի Հայաստան» ծրագրի համար։

Այդ գումարից փետրվարի 15-ի դրությամբ ծախսվել է 236 մլն 578 հազար դրամը, որից հիմնադրամի գործառնական ծախսերը (աշխատավարձեր, գործուղումներ, գնումներ) կազմել են 23 մլն 908 հազար դրամ։ Մնացած գումարն ուղղվել է շահառուներին, այդ թվում՝ 142 մլն 383 հազար դրամ՝ դասական երաժշտության հաստատությունների («Հովեր» երգչախումբ, Ֆիլհարմոնիկ նվագախումբ, Սիմֆոնիկ նվագախումբ, Կամերային երգչախումբ և Կամերային նվագախումբ) և «Երևանյան հեռանկարներ» դասական երաժշտության միջազգային փառատոնի աջակցությանը, 20 միլիոն դրամ՝ Հայրենիքի պաշտպանի վերականգնողական կենտրոնին։ Արտերկրի հեղինակավոր բուհեր ընդունված երիտասարդների ուսման վարձերին ուղղվել է 44 մլն 411 հազար դրամ, այդ նպատակին «Իմ քայլը» հիմնադրամի ջանքերով ևս 240 մլն դրամ ուղղվել է գործընկերների կողմից։

«Իմ քայլը» հիմնադրամը ՀՀ պետական բյուջեից գումար չի ստացել։

Հիմնադրամի հոգաբարձուների խորհրդում են՝
1. Աննա Հակոբյան - Հոգաբարձուների խորհրդի նախագահ
2. Լենա Նազարյան - ՀՀ ԱԺ նախագահի տեղակալ
3. Վահագն Թևոսյան - ՀՀ ԱԺ պատգամավոր
4. Արսինե Խանջյան - դերասանուհի
5. Սերժ Թանկյան - երգիչ-երգահան
6. Սառա Անջարգոլյան - Իմփաքթ Հաբ Երևանի համահիմնադիր և ղեկավար
7. Լուսինե Քասարջյան - «FestivAr» հայկական փառատոնների ասոցիացիայի գործադիր       տնօրեն
8. Վահան Վարդապետյան – բժիշկ։