Պատգամավոր․ Նախագահը կարող էր կրկին առաջադրել Վահե Գրիգորյանի թեկնածությունը

Իրավական տեսակետից ոչ մի խնդիր չկար Սահմանադրական դատարանի դատավորի պաշտոնում կրկին Վահե Գրիգորյանի թեկնածությունն առաջադրելու համար։ Այս մասին  լրագրողների հետ զրույցում ասել է «Իմ քայլը» խմբակցության պատգամավոր Նիկոլայ Բաղդասարյանը:

«Մի քիչ անարդարության զգացման երևույթ կա մթնոլորտում, որովհետև նախկինում, երբ առաջադրվել էր Վահե Գրիգորյանի թեկնածությունը, ընդհամենը քվորում չլինելու հետևանքով է, որ տվյալ անձը չի անցել», - նշել է պատգամավորը:

Նրա խոսքով, իրավական տեսակետից Վահե Գրիգորյանի թեկնածությունը կրկին առաջադրելու խնդիր չէր առաջանա և նախագահն իրավունք ուներ ևս մեկ անգամ թեկնածուին առաջադրել, որի ժամանակ արդեն կլիներ քվորում:

Անդրադառնալով Գոռ Հովհաննիսյանի թեկնածությանը` Ն. Բաղդասարյանն ասել է, որ երկուսին էլ ճանաչում է, երկուսն էլ ունեն բարձր մակարդակի գիտելիքներ այդ պաշտոնը զբաղեցնելու համար:

Դիտարկմանն՝ արդյոք Գոռ Հովհաննիսյանի թեկնածությունը կպաշտպանվի իր թիմի կողմից և նա կընտրվի առաջադրված պաշտոնում` պատագմավորն ասել է. «Չեմ կարող պատասխանել, որովհետև ես ունեմ մեկ ձայն ու դրանով իմ գաղտնի որոշումը կկայացնեմ»:

Հիշեցնենք, որ 2018 թվականի հոկտեմբերի 23-ին ԱԺ-ում գաղտնի քվեարկության ժամանակ Վահե Գրիգորյանը չէր ընտրվել ՍԴ դատավոր, քանի որ քվեարկությանը մասնակցել էր ընդհամնեը 53 պատգամավոր, որոնցից 23-ը դեմ էր քվեարկել: