Իրանական բումն այս տարի չստացվեց

Նովրուզ Բայրամ տոնն իրանցիների համար ամենասպասված տոնն է, որը նրանք նշում են շատ շքեղ և ուրախ։ Սովորաբար տարվա գլխավոր տոնը պարսիկները նշում են երկրից դուրս՝ Հայաստանում, Վրաստանում, Ադրբեջանում։

Ինչպես և ամեն տարի, այս տարի նույնպես ակնկալվում էր իրանցի զբոսաշրջիկների մեծ հոսք դեպի Հայաստան: Երկրի պետական գերատեսչությունները պատրաստվում են Նովրուզի օրերին պատշաճ դիմավորել իրանցի զբոսաշրջիկներին: Տոնական օրերին Երևան - Մեղրի ավտոճանապարհի որոշակի հատվածներում՝ տեսանելի վայրերում, ապահովվել է շարժական շտապ օգնության մեքենաների ծառայություն: Նույնիսկ Երևանի քաղաքապետին առաջարկվել է այդ օրն ապահովել Հանրապետության հրապարակի երգող շատրվանների գործարկումը:

«Տաթև» տուրիստական գործակալության աշխատակից Սևակ Դավադյանը Alternativ․am-ի թղթակցի հետ զրույցում նույնպես նշել է, որ այս տարի ուղևորահոսքը Պարսկաստանից շատ փոքր է եղել։ «Բավականաչափ քիչ տուրիստ է եկել։ Եթե նախորդ տարիներին օրական իրականացվում էր 3-4 թռիչք Իրան-Հայաստան ուղղությամբ, ապա այս տարի եղել է օրական ընդհամենը մի թռիչք», - ասել է Դավադյանը։

Ըստ նրա՝ դա պայմանավորված է Իրանի ազգային արժույթի արժեզրկմամբ․ եթե անցյալ տարի մեկ ամերիկյան դոլարն արժեր մոտ 37,5 հազար ռիալ, ապա այս տարի արժեքը բարձրացել է մինչև է 42,5 հազար ռիալ։ Իրանցի տորիստների այցը սովորաբար տևում է հինգ գիշեր։ Նախորդ տարիներին առաջարկվող փաթեթների արժեքը մեկ անձի համար կազմում էր մոտ 1000 ամերիկյան դոլար՝ ներառյալ ավիատոմսն ու հյուրանոցը։ Այս տարի իրանցիները պատրաստ են վճարել ընդամենը 500 դոլար։ Այս անգամ իրանցի տուրիստները ստիպված են եղել սահմանափակվել հյուրանոցով և ավիատոմսով։ Շրջագայություն Երևանով, էքսկուրսիաներ դեպի Սևան, Գառնի, Գեղարդ այս անգամ պահանջված չեն եղել։ Սևակ Դավադյանի խոսքով, ամբողջական տուրփաթեթ շատ քչերն են գնել։

15 տարի որպես պարսկախոս զբոսավար աշխատած Վարսենիկ Մելքումյանը նույնպես հաստատում է․երբեք Նովրուզին այսչափ քիչ մարդ չի եկել Հայաստան։ «Եկած զբոսաշրջիկների մեծ մասը եկել են իրանական ավտոբուսներով։ Նրանց 70%-ը ոչ մի շրջագայության չի գնացել,պարզապես մի քանի գիշերակաց է ունեցել Երևանում», - ասել է Վ․ Մելքումյանը։ Ըստ նրա՝ խնդիրը Իրանի տնտեսական ծանր վիճակն է։

Տուրիստական գործակալություններին շատ քչերն են դիմել։ Եթե անգամ դիմել են, ապա միայն հնարավորինս էժան հյուրանոց ամրագրելու համար։ Նախորդ տարիներին գալիս էին 4-5 օրով, յուրաքանչուրը միջինում ծախսում էր 1000 դոլար։ Այս տարի ամրագրում եմ հնարավորինս էժան հյուրանոց, գնում առանց շրջագյության տուրփաթեթներ և յորաքանչյուրի հաշվով ծախսում միջինը 500 դոլար։

Հարցին՝ արդյո՞ք հայկական տուրիստական շուկայի սակագներն են աճել, Վ․ Մելքումյանը պատասխանել է․«Մեր ծառայությունները չեն թանկացել։ Սա պարզապես իրանական արժույթի կտրուկ արժեզրկումն է ամերիկյան դոլարի նկատմամբ»։

«Եթե մարդն անցյալ տարի 300 դոլար աշխատավարձ էր ստանում, ապա այս տարի ստանում է ընդամենը 70 դոլար։ Այս պարագայում իրանցիների համար ճամփորդելը դառնում է բավականին թանկ հաճույք», - նշել է զբոսավարը։

Քաղաքացիներին սեփական երկրում պահելու համար ոչ պակաս դեր է ունեցել նաև Իրանում մեկ տարի առաջ ընդունված օրենքը։ Իրանը գրեթե եռապատկել է երկրից դուրս գալու հարկի չափը՝ 21 դոլարից դարձնելով 61 դոլար։ Ավելին, երկրից երկրորդ անգամ դուրս գալու համար իրանցիներն ստիպված են լինելու 50 տոկոսով ավել վճարել, իսկ երրորդ և ավելի անգամների դեպքում՝ 100 տոկոս ավել։

«Կառավարությունն անում է ամեն ինչ, որպեսզի իր տուրիստին ու ամերիկյան դոլարը պահի երկրի ներսում», - կարծիք է հայտնել Վ․Մելքումյանը։

ՀՀ Զբոսաշրջության կոմիտեի տվյալների համաձայն՝ 2014 թվականից սկսած, 2017 թվականն էլ ներառյալ Իրանից Հայաստան այցելությունները դինամիկ կերպով աճել են: 2014 թվականին Իրանից Հայաստան եղել է 116 հազար 324 այցելու, 2015 թվականին՝ 144 հազար 160, 2016 թվականին՝ 188 հազար 851, 2017 թվականին՝ 220 հազար 147: Արդեն 2018 թվականին նվազում է գրանցվել, այցելուների թիվը կազմել է 160 հազար 645: Զբոսաշրջության կոմիտեից փոխանցում են, որ թվի նվազումը կապված է Իրանի տնտեսական վիճակի հետ: