Նիկոլը ճիշտ է, Թրամփը սխա՞լ. ԱՄՆ-ի համար մենք դաշնակից չենք ու ԱՄՆ նախագահը մեզ պարտք չի. քաղաքագետ

Քաղաքագետ Սուրեն Սարգսյանը մեկնաբանել է վարչապետ Նիկոլ Փաշինյանի հայտարարությունը, որ Միացյալ Նահանգները «գործնականում զրո արձագանք է տվել» Հայաստանում 2018-ի գարնանը տեղի ունեցած իրադարձություններին:

Ֆեյսբուքյան իր էջում նա գրել է․ «Նիկոլը ճիշտ է, Թրամփը սխա՞լ

Վարչապետի երեկվա ելույթից հետո լրագրողներից մեկ տասնյակից ավել հեռախոսազանգեր եմ ստացել, հայտնելու կարծիքս հայ-ամերիկյան հարաբերությունների ու վարչապետի հայտարարության վերաբերյալ: Խոստացա այսօր ստատուսով անդրադառնալ:

1. Այո, եթե Հայաստանում իշխանափոխություն լիներ Բուշ 43-ի կամ Օբամայի օրոք, մենք կունենայինք որակապես այլ հայ-ամերիկյան օրակարգ, այդ թվում հայտարարություններ, աջակցություն:

2. Այո, եթե Հիլարին լիներ նախագահ, մենք կունենաինք որակապես այլ օրակարգ:

3. Հասկացեք, Թրամփը պրագմատիկ նախագահ է: Նա ոչ մեկին ոչինչ տալու պարտականություն չունի, նա մեզ պարտք չէ:

4. Միաժամանակ, Թրամփը իր պարտքն է համարում բացարձակապես իր դաշնակիցներին աջակցել, լինի դա Իսրայելը, Վրաստանը, թե այլ պետություն և սա տրամաբանական է:

5. Վերջապես հասկացեք, մենք ամերիկացիների համար ոչ դաշնակից ենք, ոչ ռազմավարական նշանակություն ունենք:

6. Հայ-ամերիկյան հարաբերություններում կան խնդիրներ: Լուծելի և ոչ այնքան:

7. Մենք ամերիկացիների բարեկամների հետ խնդիրներ ունենք (Թուրքիա, Սաուդյան Արաբիա, Իսրաել) իրանք էլ` մեր բարեկամների (ՌԴ, Իրան): Չհաշված, որ իրանք խնդիրներ ունեն մեր որոշ պաշտոնյաների հետ:

Այնպես որ, այո, Նիկոլը ճիշտ է, ամերիկացիները մեզ չեն օգնում:

Այո, Թրամփը ճիշտ է, մենք իրենց համար դաշնակից չենք, ինքն էլ մեզ պարտք չի, աշխարհում իշխանափոխություն անելու օրակարգ չունի, փող ծախսելու` նույնպես:
Այնպես որ երկուսդ էլ հանգիստ նստեք տեղներդ»։