Ուզում են Սյունիքը թուլացնել, Նիկոլն Ալիեւի հետ պասերով խաղում է. Իշխան Սաղաթելյան (տեսանյութ)
Այն, ինչ կատարվում է մեր երկրում, Հայաստանի նորանկախ պատմության մեջ նման խայտառակություն, իրավական եւ քաղաքական «բեսպրեդել» չի եղել։ Այս մասին այսօր՝ հուլիսի 16-ին, դատարանի բակում լրագրողների հետ զրույցում ասաց «Հայաստան» դաշինքի անդամ Իշխան Սաղաթելյանը:
Նշենք, որ այս պահին դատարանում քննվում է Սիսիանի համայնքապետ Արթուր Սարգսյանին կալանավորելու վերաբերյալ միջնորդությունը։
«Եթե փորձեմ քաղաքական, իրավական տերմիններով բնութագրել կամ գնահատել իրավիճակը, շատ դժվար է։ Մի մարդ, որը կասկածելի ընտրության արդյունքում վերարտադրվել է, փորձում է երկրում հաստատել պարզապես դիկտատուրա։ Սա ակնհայտ քաղաքական հետապնդում է։ Ի՞նչ է նշանակում ընդդիմադիր կուսակցության ցանկից պատգամավորի թեկնածուներին նման խայտառակ, կեղծ մեղադրանքներով բերման ենթարկել ու կալանավորել։ Այս ամեն ինչը չի կարող լավ ավարտ ունենալ։ Սա բերելու է նոր ճգնաժամի, սա մենք չենք հանդուրժելու, երբեք չենք կարող համակերպվել այս իրավիճակի հետ եւ ասել ենք, որ քաղաքական հետապնդումներից զատ այս ամենն արվում է նաեւ հատուկ նպատակով՝ Սյունիքը թուլացնելու, մեր դիմադրողականությունը կոտրելու ու ցավոտ, նոր զիջումների գնալու համար։ Այս մարդն Ալիեւի հետ պասերով խաղում է»,- ասաց Սաղաթելյանը։
Սաղաթելյանը նշեց, որ եթե երկրում չկա Սահմանադրություն, իրավական լուծումներ, ապա «Հայաստան» դաշինքի օգտին ընտրած քաղաքացիները պետք է պայքարեն գործող իշխանության դեմ. «Իրենք նաեւ շատ լավ հասկանում են՝ չի կարող «53 տոկոս» հավաքած իշխանությունն իրեն պահել այսպես։ Իրենք հասկանում են, որ իրենց իշխանությունը ժամանակավոր է եւ փորձում են այս ճանապարհով երկարացնել իրենց իշխանությունը»։
Անդրադառնալով Երասխի հատվածում ադրբեջանական կողմի ակտիվությանը՝ Իշխան Սաղաթելյանն ասաց.
«Մենք ասել ենք, որ այս իշխանության վերարտադրությունը հավասար է պետականության կորստին։ Քանի այս իշխանությունը կա, դուք ամեն առավոտ սպասեք հերթական վատ լուրին։ Եթե Ալիեւն ասում է՝ մենք ունենք Ալեւելյան Զանգեզուր, գնում ենք Արեւմտյան Զանգեզուրը վերցնելու, խոսում է արդեն Երեւանից, Սեւանից, իսկ այս մարդն ընկել ու մեր ժողովրդին է ձերբակալում։ Ձերբակալում է այն մարդկանց, ովքեր կազմակերպում էին իրենց մարզի ինքնապաշտպանությունը։ Նոր գերիներ, նոր կորուստներ, ինչո՞ւ են բանակից հեռացնում ամենակայացած, ամենամարտական հրամանատարներին։ Այս ամենը քողարկում է տարբեր կեղծ, ծիծաղելի, արդեն զզվելի, բայց երբեմն ժողովրդի ականջին հաճելի լոզունգներով»։
Իշխան Սաղաթելյանը նշեց, որ այս ապօրինությունների ֆոնին լուռ են նաեւ միջազգային կազմակերպությունները։
«Շարունակ կերակրում էին՝ եկեք զիջենք, որ լավ ապրենք, զիջումները կբերեն խաղաղության։ Կարծում եմ՝ մարդիկ հասկանում են արդեն, որ այդ զիջումները բերելու են նոր պատերազմի, այդ զիջումները երբեք չեն բերելու խաղաղության։ Թշնամու առաջ ծնկի եկած իշխանությունը չի կարող պաշտպանել մեր պետության, ժողովրդի շահերը»,- ասաց Սաղաթելյանը։