Կարևոր է Չլռելը․ մեր լռությունն է Նիկոլի և իր «կիրթ գործընկերների» ամենամեծ դաշնակիցը․ Վրթանեսյան

Թվում է, թե սրանք պարզ ճշմարտություններ են, բայց նիկոլաքարոզչական ամբողջ մեքենան լծված է այս ճշմարտությունները լղոզելու, խեղելու և ի վերջո ստիպելու, որ մենք համակերպվենք պարտության անխուսափելիության հետ։ Այս մասին ֆեյսբուքյան իր էջում գրել է ռազմական փորձագետ Կարեն Վրթանեսյանը:

«4000+ ստորագրություն 24 ժամում։

(եթե դեռ չեք միացել, ապա ստորագրահավաքի լինկը գրառման վերջում է)

Մի քանի կարևոր բան.

• Շնորհակալություն բոլորին, ովքեր ստորագրել են ու ակտիվ տարածում են հայտարարության լինկը, բացատրում են իրենց ընկերներին, ծանոթներին դրա կարևությունը։

• Մի քանի տեղ տեսա. «Անիմաստ բան է, ստորագրահավաքը ոչ մի բան չի փոխելու» տիպի մեկնաբանություններ։

Պատասխանեմ ընկերոջս բառերով. «Բնական է, որ մեկ ստորագրահավաքով, մեկ վայրյանում ո՛չ Արցախի հարցը կկարգավորվի հայանպաստ ձևով, ո՛չ Թուրքիան կընդունի ցեղասպանության հանցանքի մեղքը, ո՛չ էլ կհրաժարվեն Հայաստանը միջանցքներով մասնատելու պլաններից։ Ստորագրահավաքի նպատակը այլ է. հանրային-քաղաքական օրակարգի ձևավորումն է։ Ու ինչքան շատ ստորագրություններ լինեն, այնքան ավելի հեշտ կլինի քաղաքական ու հանրային ուժերին ընդունել այդ օրակարգը որպես ելակետ ապագայի համար»։

Կարևոր է ՉԼՌԵԼԸ։ Մեր լռությունն է Նիկոլի և իր «կիրթ գործընկերների» ամենամեծ դաշնակիցը։

• Եթե հայտարարության գլխավոր թեզերի՝ «մեխերի» հետ համաձայն եք, բայց մեր ձևակերպումներին հավան չեք, ապա գրեք ձեր ուզած ձևակերպումներով տեքստը և տարածեք ձեր տեքստը։ Կարևորը շեշտելն է, որ.

ա) Արցախը չի կարող լինել Ադրբեջանի կազմում,

բ) մենք համաձայն չենք Հայաստանը «թուրքական միջանցքներով» մասնատելուն,

գ) հայկական պահանջատիրությունը ցեղասպանության հարցում սակարկելի չէ։

Թվում է, թե սրանք պարզ ճշմարտություններ են, բայց նիկոլաքարոզչական ամբողջ մեքենան լծված է այս ճշմարտությունները լղոզելու, խեղելու և ի վերջո ստիպելու, որ մենք համակերպվենք պարտության անխուսափելիության հետ։

• Ըստ այդմ բոլորին, ով անտարբեր չէ Հայաստանի (ներառյալ Արցախի) ապագային, խնդրում եմ ոչ միայն ստորագրել, այլև շարունակել հայտարարության լինկը հնարավորինս ակտիվ տարածեը՝ անձնական էջերով, ՖԲ-խմբերում, այլ հարթակներում (Instagram, Telegram, TikTok)։

Հիշենք. ամեն դրական փոփոխություն սկսվում է ճիշտ խոսքից։

Ստորագրահավաքի հղումը Change.org կայքում՝ ահա. https://chng.it/NQYGFmGQNG»,- գրել է Վրթանեսյանը։