ԱԱԾ-ն փաստում է՝ Նիկոլ Փաշինյանը հողերը հանձնել է. Նարեկ Մանթաշյան
Երբ քո առջև որևէ իրավական գործընթաց չկա, ընդամենը հետաքրքիր սցենարիստներ են աշխատում, ժանրի կանոններով պետք է փորձել նման պատասխան տալ։ Այս մասին այսօր լրագրողների հետ զրույցում ասաց «Հայաստան» դաշինքի անդամ Նարեկ Մանթաշյանը՝ մանրամասներով ներկայացնելով իր հանդեպ հարուցված քրգործերից։
Մանթաշյանը, մասնավորապես, նշեց․
«Մեղադրվում են նոյեմբերի 10-ին կապիտուլյացիոն փաստաթղթի ստորագրումից հետո կառավարության շենք մուտք գործելու համար։ Հատկանշական է շեշտել, որ ես այդ գործով արդեն նստել եմ՝ ինչպես ասում են հայտնի սիթքոմում։ Քանի որ ինձ այս գործի շրջանակներում դեռևս նախորդ տարվա նոյեմբերին մեղադրանք առաջադրվել էր, քննվել էր ԱԱԾ-ում, և ես 3 օր անազատության մեջ էի անցկացրել։ Դրանից հետո դատարանը կալանքի միջնորդությունը մերժել է, մերժել է նաև հիմնավոր կասկածի գոյությունը»։
Վերջինս հավելեց, որ կալանքի, անզատության կամ ընտանիքի անդամներին ԱԱԾ կանչելով չեն կարող իրեն ճնշել։
«Ես կառավարության շենքում վերցրել եմ ՀՀ եռագույն դրոշը, ծածանել եմ, այնուհետև դրել եմ տեղը ու հեռացել։ Հիմա ինձ մեղադրում են դրոշը գողանալու, խոշոր չափով կողոպուտի հոդվածով։ Երևի թե խոշոր չափ ասելով ԱԱԾ-ում դրոշի չափն են հասկացել»,-ասաց նա։
«Ես բազմիցս ասել եմ, որ Նիկոլ Փաշինյանը հողատու է, ՀՀ-ից ու Արցախից հողեր է հանձնել, ինչին ի պատասխան, շատերը փորձել են հերքել դա։ Մեջբերում եմ մեղադրական եզրակացության սկզբնամասը, որն ԱԱԾ-ի կողմից հանցակազմ պարունակող պնդում է՝ «2020-ի նոյեմբերի 10-ին պատերազմը դադարեցնելու և Արցախի վերահսկողության ներքո գտնվող մի շարք տարածքներն Ադրբեջանի վերահսկողությանը հանձնելու մասին ՀՀ և Ադրբեջանի ղեկավարների միջև ձեռք բերված համաձայնության մասին հայտարարության հրապարակումից հետո», ի վերջո, ԱԱԾ-ն փաստում է, որ դրանք Արցախի տարածքներն են և հանձնվել են»,- նկատեց Մանթաշյանը